قصيده 25 يناير

وكلمة .. مش مهم مين .. لكن اسمع بذمه

دمنا ساح .. وحقنا راح..ناس مهضومه وناس مظلومه .. وحكومة نايمه ببال مرتاح

بأمر وزير.. تطلع تقارير.. فبركي ياحكومة.. ماحنا الطراطير

يناير خمسة وعشرين .. طوفان مظلوم .. فاق من النوم .. يطلب حقه بعد سنين

سنين وعقود .. ذل وقهر .. فقر وجهل .. ولسان معقود

معقود بقانون.. طاريء وفساد .. ظلموا عباد .. باعوا بلاد .. وحملوها ديون

ديون فى رقبتى .. اديلك وقتى .. ولا اعرف انام . ابدا دلوقتى .. والحق اهو قام

قام ثوار .. شباب احرار.. من كل دار .. على الخير ناويين

والنيه بصوت .. كان مكبوت .. صرخوا وقالوا ..الطاغى يغور .. والظلم يموت

نظام ينشال .. ورجال اعمال .. حراميه تقال .. اتغدو بلحمى واتعشوا سكوت

.............

قالوا عيال .. طايش مهزوز .. ولما نعوز .. ندوسهم فى الحال

حدفوا قنابل مسيله وغاز.. وامن بخوذه ووش ازاز.. درع يمين وعصايا شمال

جابوا قوات .. قتلوا وجرحوا .. شباب وبنات .. من كل حي

رصاص مطاطى ورصاص حي .. لايوم هنطاطى .. والنصر اهو جي



اعلام مشلول .. باعو المقتول ..كلام اوهام ..ولا فى الاحلام

المرئي كفيف والراديو اصم.. مليان تزييف ولا فيش دم

ساعه ايران وساعة اخوان ..والعملا هناك فى كل مكان

وجبات كنتاكى.. والمعزة تكاكى.. وباضت جبنه بيضه قريش

زى ماخالد وبعده بلال.. وباستهبال .. كسروا دماغهم بقرش حشيش

الحاج صابر والخاله سعاد.. بقدرة قادر.. بقوا من الموساد

...........

دمك ياشهيد.. لايوم هايجف .. الشمعه تقيد.. وجروحنا تخف

الشعب اتهان من ده ومن ده .. وعم سليمان يقولك اجنده

احزن عليه ولا احزن على الكبير .. اللى قاعد فوق وحادفنا فى بير

انا حزني وطنى .. وهمى وطنى .. مش حزب وطنى .. اللى سارق وطنى

ارحل بخوفنا وخد معاك جمال.. ولا اكنا شفنا .. خيول او جمال

انا عاوزه يغور .. والكل كذلك .. بالحزب بتاعه ونظامه الهالك

او اقولك ..خليك ..هانحط عليك ..فى ميدان تحرير ..ونحجز مالك

الشعب خلاص.. طلب الخلاص ..فارقنا وارحل وانفد من سؤالك

بلادى مصر حرة ..ماتقولش ارحل ليه؟.. هى حرة.. وحرة بلادي

هاتحافظ على الامين.. مهما فقره كان.. ويسقط اللى خان.. وتطرد الاعادي

............

يعني خلاص اخيرا كتبتي موضوع
بس موضوع جميل ويستحق الرد

مرسى كتير محمد انا بجد سعيده انى اتشرفت بيك مرسى كتير

شكرا ليكى سارة
احنا مصريين ومصر بلدنا وامنا
واحنا ليه نردا بالظلم ومصر فوق الكل
بس خدنا حقنا وكمان مش كله وقبل ده دم الشهيد
عمروا ما يتنسى

اكيد طبعا مرسى كتير يا هند

على فكره يا ساره انا كنت كتبه نفس الزجل ده قبل كده

بتاريخ 29/5

وبعنوان "هما كلمتين..كلمه و كلمه"

وانتى كنتى كتبالى رد على الموضوع !!

وغريبه جدا ان انتى تكررى نفس الموضوع بتاعى و بعنوان تانى

والغريب ان نفس الاعضاء اللى ردوا على الموضوع بتاعى ردوا على

الموضوع بتاعك من غير ما حد ياخد باله انا قراه قبل كده

انتى شايفه انها غريبه ولا لأ ؟؟؟؟؟

ومن المفروض ان اى شخص ينقل موضوع من موقع تانى يوضح انه

منقول.

مرسى كتير ريهام بس انا مكنتش اعرف او اكيد انا ناسيه هذا الزجل بس سورى لكى ريهام بجبد بحد سورى

لأ خلاص مفيش مشكله

بس انا زعلت عشان حسيت ان اللى بيكتب رد بيكتبه من غير

ما يقرأ الموضوع حتى؟؟

لا والله ابدا انا مفتكرشى انى شوفته قبل كده بس بجد بجد انا اسفه ياريهااااااااااااااام

خلاص ولا يهمك

لا انا بس حاسه انك زعلانه منى والكلام ده مش من قلبك بس بجد انا مكنتش اعرف

لا يا حبيبتى والله انا مش زعلانه منك خالص

انا بس وقت ما قريت الموضوع زعلت شويه ...

بس انا دلوقتى مش زعلانه خالص!!!!!!!!!!!!!!!!

اوك روحى واصلا مفيش اخوات بيزعلوا من بعض ابدا مش كده ولا ايه

طبعاً حبيبتى....